lunes, 20 de mayo de 2024
Atopamos unha posible solución nos tubos de lava lunares, cavidades formadas durante erupcións volcánicas no remoto pasado luar, que poderían darnos acubillo, destaca Germán López, investigador do Departamento de Enxeñaría Eléctrica, Electrónica de Computadores e Sistemas da Universidad de Oviedo.
O primeiro paso para a súa colonización consiste na exploración robótica do seu interior e aí é onde se enmarca este proxecto financiado pola Axencia Espacial Europea. O obxectivo é deseñar, fabricar e probar antenas para que os vehículos de exploración, máis coñecidos como rovers pola súa denominación en inglés, se comuniquen dentro das covas e poidan enviar información do seu interior.
Para realizar os ensaios do proxecto elixiuse como localización as covas volcánicas de Lanzarote pola súa analoxía coas covas lunares, tomándose medidas na cova Los Naturalistas e no tubo de lava do volcán de La Corona. Coas medidas realizadas buscamos validar os modelos físicos desenvoltos polo noso equipo de investigadores. Tanto estes modelos como as medidas realizadas utilizaranse para optimizar o sistema de comunicacións dos futuros robots exploradores, engade Alejandro Gómez San Juan, investigador de atlanTTic, o Centro de Investigación en Tecnoloxías de Telecomunicación da Universidade de Vigo.
9 investigadores da UVigo implicados no proxecto
Participan neste traballo, por parte da Universidade de Vigo, Marcos Arias, Lorena Pérez, Alejandro Gómez, Fernando Aguado, Antonio Pino, Óscar Rubiños, Fermín Navarro, Borja González e José Vázquez Cabo, todos eles de atlanTTic. Por parte da Universidad de Oviedo o equipo investigador está composto por Susana Loredo, Álvaro Pendás, Germán León, Luis F. Herrán e Miguel Fernández, xunto coas estudantes Sheila Moro e Alba Moro.
Desde o equipo de investigadores, tanto da Universidade de Vigo como da Universidad de Oviedo, queren agradecer o apoio recibido polo Servizo de Medio Ambiente e La Casa de los Volcanes do Cabildo de Lanzarote, así como á Federación Galega de Espeleoloxía. A maiores tamén desexan facer constar que a opinión aquí expresada non reflicte en modo algún a opinión oficial da Axencia Espacial Europea.
Cada galego reciclou o ano pasado unha media de 30,3 quilos de envases domésticos lixeiros e de papel-cartón, case un 3% respecto máis que o ano anterior. Estes datos enmárcanse no traballo desenvolvido pola Xunta e Ecoembes (organización sen ánimo de lucro que coordina a reciclaxe dos envases domésticos en todo o país) para mellorar o depósito, recollida e posterior recuperación deste tipo de residuos no conxunto da comunidade galega. En 2023 en Galicia recuperáronse 73.687 toneladas (Tn) de envases de orixe doméstica (37.640 Tn de envases plásticos, 23.781 Tn de papel-cartón, 11.566 Tn de envases metálicos e 700 Tn de recipientes de madeira).
A directora da Axencia Galega de Doazón de Sangue, Órganos e Tecidos, ADOS, Marisa López, salientou que o pasado ano se rexistraron en Galicia 103.525 doazóns de sangue, das que 9.564 se corresponden a persoas que doaron por primeira vez. Estes bos resultados, que foron expostos pola directora na Comisión 5ª de Sanidade do Parlamento de Galicia, sitúan Galicia entre as comunidades máis solidarias. Este número de doazóns permitiu dar resposta e garantir o abastecemento de hemoderivados de todos os centros hospitalarios de Galicia, en todo momento, e de xeito ininterrompido.
